Deddf Rheoleiddio ac Arolygu Gofal Cymdeithasol (Cymru) 2016
2016 dccc 2
Deddf Cynulliad Cenedlaethol Cymru i wneud darpariaeth ar gyfer cofrestru a rheoleiddio personau sy’n darparu gwasanaethau cartrefi gofal, gwasanaethau llety diogel, gwasanaethau canolfannau preswyl i deuluoedd, gwasanaethau mabwysiadu, gwasanaethau maethu, gwasanaethau lleoli oedolion, gwasanaethau eirioli a gwasanaethau cymorth cartref; sy’n diwygio Deddf Gwasanaethau Cymdeithasol a Llesiant (Cymru) 2014 mewn cysylltiad â rheoleiddio swyddogaethau gwasanaethau cymdeithasol awdurdodau lleol; ar gyfer ailenwi Cyngor Gofal Cymru yn Ofal Cymdeithasol Cymru; i Ofal Cymdeithasol Cymru ddarparu cyngor a chynhorthwy arall i bersonau sy’n darparu gwasanaethau sy’n ymwneud â gofal a chymorth; ar gyfer cofrestru, rheoleiddio a hyfforddi gweithwyr gofal cymdeithasol; ac at ddibenion cysylltiedig.
Gan ei fod wedi ei basio gan Gynulliad Cenedlaethol Cymru ac wedi derbyn cydsyniad Ei Mawrhydi, deddfir fel a ganlyn: