Targedau gwastraff LL+C

3 Targedau ar gyfer ailgylchu, paratoi i ailddefnyddio a chompostio LL+C

(1) Pennir y targedau ar gyfer ailgylchu, paratoi i ailddefnyddio a chompostio yn is-adrannau (2) a (3).

(2) Rhaid i awdurdod lleol sicrhau yr adenillir, drwy gyfrwng unrhyw un o'r gweithrediadau a bennir yn is-adran (5), o leiaf y maint targed o'i wastraff bwrdeistrefol–

(a) bob blwyddyn ariannol darged, a

(b) bob blwyddyn ariannol ddilynol tan y flwyddyn ariannol darged nesaf.

(3) Yn y tabl canlynol–

(a) mae colofn 1 yn pennu'r maint targed ar gyfer blwyddyn ariannol darged (a'r blynyddoedd ariannol sy'n dod o fewn is-adran (2)(b)), a

(b) mae colofn 2 yn pennu'r flwyddyn ariannol darged y mae'r maint targed yn y cofnod cyfatebol yng ngholofn 1 yn gymwys iddi.

TABL

Maint targed	Blwyddyn ariannol darged
52%	2012/13
58%	2015/16
64%	2019/20
70%	2024/25

(4) Caiff Gweinidogion Cymru ddiwygio'r tabl hwn drwy orchymyn.

(5) Y gweithrediadau y cyfeiriwyd atynt yn is-adran (2) yw–

(a) ailgylchu;

(b) paratoi i ailddefnyddio;

(c) compostio (gan gynnwys unrhyw ffurf arall ar drawsnewid drwy brosesau biolegol).

(6) Caiff Gweinidogion Cymru wneud darpariaeth drwy orchymyn i ganfod a yw gwastraff yn cael ei ailgylchu, ei baratoi i'w ailddefnyddio, neu ei gompostio at ddibenion y targedau o dan yr adran hon.

(7) Mae awdurdod lleol nad yw'n cyrraedd targed ailgylchu, paratoi i ailddefnyddio a chompostio yn agored i gosb sydd i'w thalu i Weinidogion Cymru.

(8) At ddibenion yr adran hon, gwastraff trefol awdurdod lleol o flwyddyn ariannol darged yw maint cyfan pob un o'r canlynol yn ôl pwysau–

(a) yr holl wastraff a gasglwyd yn y flwyddyn honno gan awdurdod lleol o dan adran 45 o Ddeddf Diogelu'r Amgylchedd 1990;

(b) yr holl wastraff a ollyngwyd yn y flwyddyn honno mewn mannau a ddarparwyd gan awdurdod lleol o dan is-adrannau (1)(b) a (3) o adran 51 o'r Ddeddf honno;

(c) unrhyw wastraff arall a bennir drwy orchymyn gan Weinidogion Cymru.

(9) Yn yr adran hon, ystyr “blwyddyn ariannol” yw cyfnod o 12 mis sy'n diweddu ar 31 Mawrth.

Gwybodaeth Cychwyn

I1 A. 3 ddim mewn grym ar Gymeradwyaeth Frenhinol, gweler a. 21(1)

I2 A. 3 mewn grym ar 4.3.2011 gan O.S. 2011/476, ergl. 2

4 Rheoliadau i osod targedau gwastraff LL+C

(1) Caiff Gweinidogion Cymru, drwy reoliadau–

(a) pennu targedau gwastraff sydd i'w cyrraedd gan awdurdod lleol wrth arfer ei swyddogaethau;

(b) pennu dangosyddion y gellir cyfeirio atynt i fesur i ba raddau y mae awdurdod lleol yn bodloni'r targedau o dan baragraff (a);

(c) gosod atebolrwydd ar awdurdod lleol i dalu cosb i Weinidogion Cymru os na chyrhaeddir targed o dan baragraff (a).

(2) At ddibenion is-adran (1)(a), mae “targedau gwastraff” yn dargedau sy'n ymwneud ag atal, lleihau, casglu, rheoli, trin neu waredu gwastraff.

Gwybodaeth Cychwyn

I3 A. 4 mewn grym ar 15.2.2011, gweler a. 21(2)

5 Monitro ac archwilio cydymffurfedd â thargedau LL+C

(1) Caiff Gweinidogion Cymru wneud darpariaeth drwy reoliadau–

(a) ynghylch sut y mae cydymffurfedd ag unrhyw darged perthnasol i'w asesu;

(b) ynghylch trefniadau ar gyfer monitro ac archwilio cydymffurfedd ag unrhyw darged perthnasol;

(c) sy'n rhoi pwerau mynediad a phwerau arolygu mewn cysylltiad â'r monitro a'r archwilio hwnnw ar gyfer personau a awdurdodir gan Weinidogion Cymru;

(d) sy'n ei gwneud yn ofynnol i gofnodion gael eu cadw gan awdurdod lleol mewn cysylltiad â thargedau perthnasol;

(e) sy'n ei gwneud yn ofynnol i wybodaeth gael ei darparu gan awdurdod lleol i bersonau penodedig ar ffurf benodedig neu mewn dull penodedig mewn cysylltiad â thargedau perthnasol;

(f) sy'n ei gwneud yn ofynnol i wybodaeth gael ei chyhoeddi mewn cysylltiad â thargedau perthnasol;

(g) sy'n gosod atebolrwydd ar awdurdod lleol i dalu cosb os yw'n methu â chydymffurfio â gofyniad mewn rheoliadau o dan unrhyw un neu unrhyw rai o baragraffau (b) i (f).

(2) Yn yr adran hon, “targedau perthnasol” yw–

(a) targedau ailgylchu, paratoi i ailddefnyddio a chompostio o dan adran 3;

(b) unrhyw dargedau gwastraff o dan adran 4(1)(a).

Gwybodaeth Cychwyn

I4 A. 5 mewn grym ar 15.2.2011, gweler a. 21(2)

6 Rheoliadau am gosbau LL+C

(1) Mae'r adran hon yn gymwys i gosbau o dan adran 3(7), adran 4(1)(c) ac adran 5(1)(g).

(2) Caiff Gweinidogion Cymru, drwy reoliadau–

(a) pennu symiau cosbau neu reolau ar gyfer cyfrifo'r symiau hynny;

(b) gwneud darpariaeth ynghylch pryd y mae taliadau o ran cosbau yn ddyledus;

(c) gwneud darpariaeth ar gyfer llog pan fo taliadau o ran cosbau yn ddyledus ond heb eu gwneud;

(d) gwneud darpariaeth ar gyfer adennill neu wrth-hawlio, a sicrhau, symiau, o ran cosbau a llog, sydd heb eu talu;

(e) gwneud darpariaeth ynghylch hepgor cosbau.

Gwybodaeth Cychwyn

I5 A. 6 mewn grym ar 15.2.2011, gweler a. 21(2)

7 Canllawiau LL+C

Wrth arfer ei swyddogaethau o dan adrannau 3 i 6, rhaid i awdurdod lleol roi sylw i ganllawiau o roddir o bryd i'w gilydd gan Weinidogion Cymru.

Gwybodaeth Cychwyn

I6 A. 7 mewn grym ar 15.2.2011, gweler a. 21(2)

8 Ymgynghori LL+C

(1) Cyn gwneud gorchymyn neu reoliadau o dan adran 3 neu reoliadau o dan adrannau 4, 5 neu 6, neu rhoi canllawiau o dan adran 7, rhaid i Weinidogion Cymru ymgynghori â'r canlynol–

(a) [F1 Corff Adnoddau Naturiol Cymru];

(b) pob awdurdod lleol;

(c) unrhyw bersonau eraill y mae Gweinidogion Cymru yn barnu eu bod yn briodol.

(2) At ddibenion is-adran (1), mae ymgynghoriad sydd wedi ei wneud cyn pasio'r Mesur hwn yn cael effaith fel pe bai wedi ei wneud ar ôl ei basio.

Diwygiadau Testunol

F1 Geiriau yn a. 8(1)(a) wedi eu hamnewid (1.4.2013) gan Gorchymyn Corff Adnoddau Naturiol Cymru (Swyddogaethau) 2013 (O.S. 2013/755), ergl. 1(2), Atod. 3 para. 2 (ynghyd ag Atod. 7)

Gwybodaeth Cychwyn

I7 A. 8 mewn grym ar 15.2.2011, gweler a. 21(2)