Gorchymyn Draenio Cynaliadwy (Gorfodi) (Cymru) 2018

RHAN 4 Apelau yn erbyn hysbysiadau gorfodi

Hawl apelio

12.—( 1) Caiff datblygwr y rhoddir hysbysiad gorfodi iddo apelio drwy hysbysiad i Weinidogion Cymru yn erbyn y penderfyniad i’w roi.

(2) Seiliau’r apêl yw—

(a) bod y penderfyniad yn seiliedig ar wall ffeithiol;

(b) bod y penderfyniad yn anghywir mewn cyfraith;

(c) bod y penderfyniad yn afresymol;

(d) nad oes toriad o’r gofyniad i gael cymeradwyaeth.

(3) Mae hysbysiad gorfodi yn cael ei atal dros dro hyd nes y caiff apêl ei phenderfynu neu ei thynnu’n ôl.

Terfyn amser ar gyfer gwneud apêl

13.   Rhaid cyflwyno apêl o fewn y cyfnod o 4 wythnos sy’n dechrau â’r diwrnod y rhoddir hysbysiad gorfodi i ddatblygwr.

Gwneud apêl

14.—( 1) Rhaid i hysbysiad apêl yn erbyn hysbysiad gorfodi—

(a) bod yn ysgrifenedig, ar ffurflen a gafwyd oddi wrth Weinidogion Cymru,

(b) datgan seiliau’r apêl,

(c) datgan y ffeithiau y bydd yr apelydd yn dibynnu arnynt i ategu pob un o’r seiliau hynny ac unrhyw fanylion eraill am yr achos y mae’r apelydd yn bwriadu ei gyflwyno mewn perthynas â’r apêl, a

(d) cynnwys enw, cyfeiriad (gan gynnwys unrhyw gyfeiriad e-bost) a rhif ffôn yr apelydd ac unrhyw asiant sy’n gweithredu ar ran yr apelydd.

(2) Rhaid anfon yr hysbysiad at Weinidogion Cymru gyda’r canlynol—

(a) datganiad ynghylch pa un a yw’r apelydd yn dymuno i’r apêl gael ei hymdrin drwy sylwadau ysgrifenedig, drwy wrandawiad neu drwy ymchwiliad,

(b) copi o’r hysbysiad gorfodi, ac

(c) copi o unrhyw hysbysiad stop neu hysbysiad stop dros dro cysylltiedig.

(3) Rhaid i ddatblygwr sy’n anfon hysbysiad apêl at Weinidogion Cymru, ar yr un pryd, anfon copi o’r hysbysiad apêl a’r dogfennau sy’n mynd gyda’r hysbysiad apêl i’r corff cymeradwyo.

(4) Yn yr erthygl hon, ystyr “dogfennau sy’n mynd gyda” yw’r dogfennau a grybwyllir ym mharagraff (2).

(5) Caniateir i unrhyw hysbysiad neu ddogfen arall y mae’r erthygl hon yn ei gwneud yn ofynnol i’w hanfon neu i’w darparu gael eu hanfon drwy’r post neu gyfathrebiad electronig.

Defnyddio cyfathrebiadau electronig

15.—( 1) Mae paragraffau (2) i (6) o’r erthygl hon yn gymwys pan fo’r apelydd yn defnyddio cyfathrebiad electronig at y diben o gyflawni unrhyw ofyniad yn erthygl 14.

(2) Ystyrir bod y gofyniad wedi ei gyflawni pan fo’r hysbysiad neu’r ddogfen arall a drosglwyddir drwy gyfrwng y cyfathrebiad electronig—

(a) yn un y gall y derbynnydd gael mynediad iddo neu iddi,

(b) yn ddarllenadwy ym mhob modd perthnasol, ac

(c) yn ddigon parhaol fel bod modd cyfeirio ato neu ati yn nes ymlaen.

(3) Ym mharagraff (2), ystyr “yn ddarllenadwy ym mhob modd perthnasol” yw bod yr wybodaeth a gynhwysir yn yr hysbysiad neu’r ddogfen arall ar gael i’r derbynnydd i’r un graddau â phe bai’r wybodaeth wedi ei hanfon neu ei rhoi drwy gyfrwng dogfen ar ffurf brintiedig.

(4) Os caiff y derbynnydd y cyfathrebiad electronig y tu hwnt i’w oriau busnes, cymerir ei fod wedi ei gael ar y diwrnod gwaith nesaf.

(5) Mae gofyniad yn erthygl 14 y dylai unrhyw hysbysiad neu ddogfen arall fod yn ysgrifenedig wedi ei fodloni pan fo’r ddogfen honno’n bodloni’r meini prawf ym mharagraff (2), ac mae “ysgrifenedig” ac ymadroddion cytras i’w dehongli yn unol â hynny.

(6) Pan fo apelydd yn anfon unrhyw hysbysiad neu ddogfen arall at Weinidogion Cymru drwy ddefnyddio cyfathrebiadau electronig, cymerir eu bod wedi cytuno i’r hyn a ganlyn—

(a) i ddefnyddio’r cyfathrebiadau hynny at yr holl ddibenion sy’n ymwneud â’r apêl y mae modd eu cyflawni drwy gyfrwng electronig;

(b) mai cyfeiriad yr apelydd at ddiben cyfathrebiadau o’r fath yw’r cyfeiriad sydd wedi ei ymgorffori yn yr hysbysiad neu’r ddogfen arall, neu sydd fel arall wedi ei gysylltu yn rhesymegol â hwy;

(c) y bydd cytundeb tybiedig yr apelydd o dan y paragraff hwn yn parhau hyd nes iddo hysbysu ei fod yn dymuno dirymu’r cytundeb yn unol ag erthygl 16.

Tynnu’n ôl y cydsyniad i ddefnyddio cyfathrebiadau electronig

16.—( 1) Pan na fo apelydd bellach yn fodlon derbyn y defnydd o gyfathrebiadau electronig at unrhyw ddiben o’r Gorchymyn hwn y mae modd ei gyflawni yn electronig, rhaid i’r apelydd roi hysbysiad ysgrifenedig sydd—

(a) yn tynnu’n ôl unrhyw gyfeiriad yr hysbyswyd Gweinidogion Cymru neu gorff cymeradwyo amdano at y diben hwnnw, neu

(b) yn dirymu unrhyw gytundeb a wnaed gyda Gweinidogion Cymru neu gyda chorff cymeradwyo at y diben hwnnw.

(2) Bydd y tynnu’n ôl neu’r dirymu o dan baragraff (1) yn derfynol ac yn cymryd effaith ar y diweddaraf o’r hyn a ganlyn—

(a) y dyddiad a bennwyd gan yr apelydd yn yr hysbysiad, ond ni ddylai’r dyddiad hwnnw fod yn llai nag 1 wythnos ar ôl y dyddiad y rhoddir yr hysbysiad, neu

(b) y dyddiad y daw’r cyfnod o 1 wythnos i ben gan ddechrau ar y dyddiad pan y rhoddir yr hysbysiad.

Y weithdrefn apelio

17.—( 1) Mae paragraffau (2) i (4) o’r erthygl hon yn gymwys pan fo Gweinidogion Cymru yn cael hysbysiad apêl dilys.

(2) Mae adran 319B (pennu’r weithdrefn ar gyfer achosion penodol: Cymru) o Ddeddf 1990 a Rheoliadau Cynllunio Gwlad a Thref (Ceisiadau Atgyfeiriedig a Gweithdrefn Apelau) (Cymru) 2017(1) (“Rheoliadau 2017”) yn gymwys i apêl o dan y Gorchymyn hwn gyda’r addasiadau a ddisgrifir ym mharagraff (3), fel pe bai’n apêl a gyflwynir o dan adran 174 (apêl yn erbyn hysbysiad gorfodi) o Ddeddf 1990.

(3) Yr addasiadau yw—

(a) mae i unrhyw gyfeiriad at “apelydd” yr ystyr a roddir yn erthygl 2;

(b) mae unrhyw gyfeiriad at “apêl” o dan adran 174 o Ddeddf 1990 i’w ddarllen fel cyfeiriad at apêl o dan y Gorchymyn hwn;

(c) mae unrhyw gyfeiriad at “person penodedig” yn gyfeiriad at berson a benodwyd gan Weinidogion Cymru o dan y Gorchymyn hwn i adrodd i Weinidogion Cymru;

(d) mae unrhyw gyfeiriad at “apêl gorfodi” i’w ddarllen fel cyfeiriad at apêl yn erbyn hysbysiad gorfodi o dan y Gorchymyn hwn;

(e) mae unrhyw gyfeiriad at “hysbysiad gorfodi” o dan adran 172(1) o Ddeddf 1990 i’w ddarllen fel cyfeiriad at hysbysiad gorfodi o dan y Gorchymyn hwn;

(f) mae cyfeiriad at “datganiad achos llawn” i’w ddarllen fel cyfeiriad at y datganiad yn erthygl 14(1)(c);

(g) mae unrhyw gyfeiriad at “personau â buddiant” i’w ddarllen fel cyfeiriad at yr ymgyngoreion statudol a bennir ym mharagraff 11(3) o Atodlen 3;

(h) mae unrhyw gyfeiriad at “awdurdod cynllunio lleol” i’w ddarllen fel cyfeiriad at y corff cymeradwyo a roddodd hysbysiad gorfodi o dan y Gorchymyn hwn.

(4) Yn yr erthygl hon, ystyr “hysbysiad apêl dilys” yw hysbysiad apêl—

(a) sy’n cydymffurfio â gofynion erthygl 14(1),

(b) a anfonir at Weinidogion Cymru—

(i) yn unol ag erthygl 14(2),

(ii) o fewn y cyfnod a bennir yn erthygl 13, ac

(c) y mae’r apelydd yn ardystio ei fod wedi anfon copi i’r corff cymeradwyo yn unol ag erthygl 14(3).

Penderfynu ar apêl

18.—( 1) Mae apêl o dan y Gorchymyn hwn i’w phenderfynu gan Weinidogion Cymru.

(2) At ddibenion paragraff (1), caiff Gweinidogion Cymru benodi person (“y person penodedig”) i adrodd i Weinidogion Cymru.

Pwerau Gweinidogion Cymru wrth benderfynu ar apêl

19.   Wrth benderfynu ar apêl yn erbyn hysbysiad gorfodi, caiff Gweinidogion Cymru—

(a) penderfynu bod yr hysbysiad i beidio â chael effaith, neu

(b) cadarnhau neu amrywio’r hysbysiad.

Tystiolaeth a chostau

20.—( 1) Mae is-adrannau (2) a (3) o adran 250 o Ddeddf Llywodraeth Leol 1972(2) (ymchwiliadau lleol: tystiolaeth a chostau) yn gymwys gyda’r addasiadau a ddisgrifir ym mharagraff (2) i ymchwiliad o dan y Gorchymyn hwn fel y maent yn gymwys i ymchwiliadau lleol o dan yr adran honno.

(2) Yr addasiadau yw—

(a) mae unrhyw gyfeiriad at y person a benodir i gynnal yr ymchwiliad i’w ddarllen fel cyfeiriad at y person a benodir gan Weinidogion Cymru o dan erthygl 18(2);

(b) mae unrhyw gyfeiriad at awdurdod lleol i’w ddarllen fel cyfeiriad at gorff cymeradwyo.

(3) Mae adran 322C o Ddeddf 1990(3) (costau: Cymru) yn gymwys mewn perthynas â gwrandawiad neu ymchwiliad o dan y Gorchymyn hwn fel y mae’n gymwys mewn perthynas â gwrandawiad neu ymchwiliad lleol y cyfeirir ato yn yr adran honno.

(4) Yn ddarostyngedig i baragraff (3), rhaid i gostau gwrandawiad neu ymchwiliad a gynhelir o dan y Gorchymyn hwn gael eu talu gan Weinidogion Cymru.

(1)

O.S. 2017/544 (Cy. 121).

(2)

1972 p. 70. Diwygiwyd adran 250 gan adrannau 37, 38 a 46 o Ddeddf Cyfiawnder Troseddol 1982 (p. 48); adran 49(2) o Ddeddf Tai a Chynllunio 1986 (p. 63) ac Atodlen 12 iddi a chan y Ddeddf Cyfraith Statud (Diddymiadau) 1989 (p. 43).

(3)

Mewnosodwyd adran 322C gan adran 49 o Ddeddf Cynllunio (Cymru) 2015 (dccc 4).