Rheoliadau Anffurfio (Triniaethau a Ganiateir) (Cymru) (Diwygio) 2008

Offerynnau Statudol Cymru

2008 Rhif 3094 (Cy.273)

ANIFEILIAID, CYMRU

LLES ANIFEILIAID

Rheoliadau Anffurfio (Triniaethau a Ganiateir) (Cymru) (Diwygio) 2008

Gwnaed

2 Rhagfyr 2008

Gosodwyd gerbron Cynulliad Cenedlaethol Cymru

29 Hydref 2008

Yn dod i rym

3 Rhagfyr 2008

Gweinidogion Cymru, o ran Cymru, yw'r awdurdod cenedlaethol priodol at ddibenion arfer y pwerau a roddwyd gan adran 5(4) o Ddeddf Lles Anifeiliaid 2006(1), ac maent yn gwneud y Rheoliadau canlynol drwy arfer y pwerau hynny.

Mae Gweinidogion Cymru wedi ymgynghori yn unol ag adran 5(5) o'r Ddeddf honno.

Yn unol ag adran 61(2) o'r Ddeddf honno, mae drafft o'r offeryn hwn wedi ei osod gerbron Cynulliad Cenedlaethol Cymru ac wedi ei gymeradwyo drwy benderfyniad a wnaed gan Gynulliad Cenedlaethol Cymru.

Enwi, cychwyn a chymhwyso

1.—( 1) Enw'r Rheoliadau hyn yw Rheoliadau Anffurfio (Triniaethau a Ganiateir) (Cymru) (Diwygio) 2008.

(2) Daw'r Rheoliadau hyn i rym ar y diwrnod ar ôl y diwrnod y'u gwneir.

(3) Mae'r Rheoliadau hyn yn gymwys o ran Cymru.

Diwygiadau i Reoliadau Anffurfio (Triniaethau a Ganiateir) (Cymru) 2007

2.   Diwygir Rheoliadau Anffurfio (Triniaethau a Ganiateir) (Cymru) 2007(2) fel a ganlyn.

Rheoliad 3

3.   Yn rheoliad 3 (eithriadau i'r gwaharddiad ar anffurfio), yn lle is-baragraffau (c) ac (ch) rhodder—

“(c) mewn amgylchiadau hylan;

(ch) yn unol ag arferion da; ac

(d) yn unol â rheoliad 5, pan fo'n gymwys”.

Rheoliad 4

4.   Yn rheoliad 4(1) (cyflawni triniaethau gwaharddedig mewn argyfwng) hepgorer y geiriau “a warchodir”.

Rheoliad 5

5.   Yn lle rheoliad 5 (personau sy'n cael rhoi triniaethau a ganiateir) rhodder—

“5.— (1) Ac eithrio'r triniaethau y cyfeirir atynt ym mharagraff (2), ni cheir rhoi unrhyw driniaeth, a ganiateir o dan reoliad 3 ac y mae Deddf Milfeddygon 1966(3) neu Orchymyn Milfeddygon (Esemptiadau) 1962(4) yn gymwys iddi, ac eithrio gan berson y caniateir iddo ei rhoi o dan y ddeddfwriaeth honno.

(2) Caniateir tocio cynffonau neu ysbaddu moch naill ai gan filfeddygon yn unig neu, pan nad yw'r anifeiliaid yn hyn na 7 diwrnod oed, gan berson sy'n brofiadol yn y technegau cysylltiedig a naill ai'n berson sy'n gyfrifol am yr anifail neu'n berson a gyflogir neu a gymerir ymlaen gan berson o'r fath i drin yr anifail.”.

Atodlen 1

6.—( 1) Mae'r diwygiadau i Atodlen 1 (triniaethau a ganiateir) fel a ganlyn.

(2) Yn yr adran ar adar, yn lle'r rhestr o dan y pennawd “Triniaethau Adnabod” rhodder—

• “Microsglodynnu.

• Tagio gyddfau.

• Bylchu gweoedd.

• Tagio gweoedd.

• Tagio adenydd.

• Dulliau eraill o adnabod anifeiliaid sy'n cynnwys anffurfiad sy'n ofynnol gan y gyfraith.”.

(3) Yn yr adran ar ddefaid, yn lle'r rhestr o dan y pennawd “Triniaethau ar gyfer Rheoli Atgenhedlu.” rhodder—

• “Ysbaddu.

• Casglu neu drosglwyddo embryonau drwy ddull llawfeddygol.

• Gosod dyfais atal cenhedlu o dan y croen.

• Ffrwythloni laparosgopig.

• Trawsblannu ofa, gan gynnwys casglu ofa, drwy ddull llawfeddygol.

• Fasdoriad.”.

(4) Yn yr adran ar eifr, yn lle'r rhestr o dan y pennawd “Triniaethau ar gyfer Rheoli Atgenhedlu.” rhodder —

• “Ysbaddu.

• Casglu neu drosglwyddo embryonau drwy ddull llawfeddygol.

• Gosod dyfais atal cenhedlu o dan y croen.

• Ffrwythloni laparosgopig.

• Trawsblannu ofa, gan gynnwys casglu ofa, drwy ddull llawfeddygol.

• Fasdoriad.”.

Atodlen 4

7.—( 1) Mae'r diwygiadau i Atodlen 4 (adar: gofynion wrth roi triniaethau penodol a ganiateir) fel a ganlyn.

(2) Yn union cyn paragraff 1 (ysbaddu) mewnosoder—

“Pob triniaeth yn yr adran ar adar yn Atodlen 1

A1.   Ac eithrio yn achos tocio pigau (pan fo darpariaethau paragraff 5 yn gymwys), ni chaniateir rhoi unrhyw driniaeth a restrir yn yr adran ar adar yn Atodlen 1 i adar sy'n ieir dodwy neu y bwriedir iddynt fod yn ieir dodwy, oni chedwir hwy ar sefydliadau sydd â llai na 350 o adar o'r fath.

Tagio gyddfau

A2.   Caniateir rhoi'r driniaeth i hwyaid a ffermir, yn unig, a hynny yn unig os rhoddir y driniaeth o fewn 36 awr ar ôl deor at ddibenion rhaglen gwella brîd.

Bylchu gweoedd

A3.   Caniateir rhoi'r driniaeth i hwyaid a ffermir, yn unig, a hynny yn unig os rhoddir y driniaeth o fewn 36 awr ar ôl deor at ddibenion rhaglen gwella brîd.

Tagio gweoedd

A4.   Caniateir rhoi'r driniaeth i adar a ffermir at ddibenion rhaglenni gwella brîd neu i brofi am bresenoldeb clefyd, yn unig.

Caniateir rhoi'r driniaeth i adar ac eithrio adar a ffermir at ddibenion cadwraeth yn unig (gan gynnwys addysg a rhaglenni bridio mewn caethiwed) neu ar gyfer ymchwil.

Tagio adenydd

A5.   Caniateir rhoi'r driniaeth i adar a ffermir at ddibenion rhaglenni gwella brîd neu brofi am bresenoldeb clefyd, yn unig.

Caniateir rhoi'r driniaeth i adar ac eithrio adar a ffermir at ddibenion cadwraeth yn unig (gan gynnwys addysg a rhaglenni bridio mewn caethiwed) neu ar gyfer ymchwil.”.

(3) Ym mharagraff 5 (torri pigau dofednod), yn lle'r geiriau “Ar ddofednod y bwriedir iddynt fod yn ieir dodwy ac a gedwir mewn sefydliadau gyda 350 neu ragor o ieir dodwy” rhodder “Ar ddofednod y bwriedir iddynt fod yn ieir dodwy ac a gedwir mewn sefydliadau gyda 350 neu ragor o ddofednod o'r fath neu ieir dodwy”.

Atodlen 5

8.—( 1) Mae'r diwygiadau i Atodlen 5 (defaid: gofynion wrth roi triniaethau penodol a ganiateir) fel a ganlyn.

(2) Ar ôl paragraff 1 (ysbaddu) mewnosoder—

“Casglu neu drosglwyddo embryonau drwy ddull llawfeddygol

1A.   Rhaid rhoi anesthetig.”.

(3) Ar ôl paragraff 2 (gosod dyfais atal cenhedlu o dan y croen) mewnosoder —

“Ffrwythloni laparosgopig

2A.   Ni cheir rhoi'r driniaeth ac eithrio fel rhan o raglen gwella brîd.

Rhaid rhoi anesthetig.

Trawsblannu ofa, gan gynnwys casglu ofa, drwy ddull llawfeddygol

2B.   Rhaid rhoi anesthetig.”.

Atodlen 6

9.—( 1) Mae'r diwygiadau i Atodlen 6 (geifr: gofynion wrth roi triniaethau penodol a ganiateir) fel a ganlyn.

(2) Ar ôl paragraff 1 (ysbaddu) mewnosoder—

“Casglu neu drosglwyddo embryonau drwy ddull llawfeddygol

1A.   Rhaid rhoi anesthetig.”.

(3) Ar ôl paragraff 2 (gosod dyfais atal cenhedlu o dan y croen) mewnosoder —

“Ffrwythloni laparosgopig

2A.   Ni cheir rhoi'r driniaeth ac eithrio fel rhan o raglen gwella brîd.

Rhaid rhoi anesthetig.

Trawsblannu ofa, gan gynnwys casglu ofa, drwy ddull llawfeddygol

2B.   Rhaid rhoi anesthetig.”.

Elin Jones

Y Gweinidog dros Faterion Gwledig, un o Weinidogion Cymru

2 Rhagfyr 2008

Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn yn diwygio Rheoliadau Anffurfio (Triniaethau a Ganiateir) (Cymru) 2007 (O.S. 2007/1029 (Cy. 96)) (“Rheoliadau 2007”) drwy fewnosod triniaethau newydd a ganiateir a'r gofynion sy'n gymwys iddynt. Y triniaethau newydd a ganiateir yw tagio adenydd a thagio gweoedd, tagio gyddfau a bylchu gweoedd hwyaid fferm ac, yn achos defaid a geifr, casglu neu drosglwyddo embryonau drwy ddull llawfeddygol, ffrwythloni laparosgopig a thrawsblannu (gan gynnwys casglu) ofa drwy ddull llawfeddygol. Mae'r Rheoliadau yn diwygio rheoliad 3 ac yn gosod rheoliad newydd yn lle rheoliad 5, ynglyn â phwy gaiff roi'r triniaethau a ganiateir. Mae'r Rheoliadau hefyd yn diwygio rheoliad 4 er mwyn cywiro mân wall drafftio.

Mewn perthynas â thocio cynffonau ac ysbaddu moch, mae'r Rheoliadau hyn ynghyd â Rheoliadau 2007 yn gweithredu paragraff 8 o Bennod I o'r Atodiad i Gyfarwyddeb y Cyngor 91/630/EEC sy'n gosod y safonau gofynnol ar gyfer gwarchod moch (OJ Rhif L340, 11.12.1991, t.33), fel y'i diwygiwyd gan Gyfarwyddeb y Cyngor 2001/88/EC, OJ Rhif L316, 1.12.2001, t.1), Cyfarwyddeb y Comisiwn 2001/93/EC (OJ Rhif L316, 1.12.2001, t.36) a Rheoliad y Cyngor (EC) Rhif 806/2003 (OJ Rhif L122, 16.5.2003, t.1). Mewn perthynas â ieir dodwy, mae'r Rheoliadau hyn ynghyd â Rheoliadau 2007 yn gweithredu paragraff 8 o'r Atodiad i Gyfarwyddeb y Cyngor 1999/74/EC sy'n gosod y safonau gofynnol ar gyfer gwarchod ieir dodwy (OJ Rhif L203, 3.8.1999, t.53, fel y'i diwygiwyd gan Reoliad y Cyngor (EC) Rhif 806/2003 (OJ Rhif L122, 16.5.2003, t.1).

Mae Rheoliadau 2007 yn pennu i ba driniaethau nad yw'r tramgwyddau yn adran 5(1) a (2) o Ddeddf Lles Anifeiliaid 2006 (p.45) yn gymwys. Mae'r darpariaethau hynny yn y Ddeddf yn ei gwneud yn dramgwydd rhoi triniaeth waharddedig neu beri rhoi triniaeth waharddedig i anifail a warchodir neu, o dan amgylchiadau penodedig, caniatáu rhoi triniaeth o'r fath i anifail. Triniaeth waharddedig yw triniaeth sy'n cynnwys ymyrryd â meinweoedd sensitif neu strwythur esgyrn yr anifail ac eithrio at y diben o'i drin yn feddygol (gweler adran 5(3) o'r Ddeddf).

Mae Asesiad Effaith Rheoleiddiol wedi ei baratoi. Gellir cael copïau ohono o Swyddfa'r Prif Swyddog Milfeddygol, Cynulliad Cenedlaethol Cymru, Parc Cathays, Caerdydd CF10 3NQ.

(1)

2006 p. 45. Diffinnir yr awdurdod cenedlaethol priodol yn adran 62(1) o'r Ddeddf. Yn rhinwedd adran 162 o Ddeddf Llywodraeth Cymru 2006 (p.32) a pharagraff 30 o Atodlen 11 i'r Ddeddf honno, mae'r swyddogaethau hyn yn arferadwy gan Weinidogion Cymru.

(2)

O.S. 2007/1029 (Cy . 96).

(3)

1966 p. 36; yr offerynnau perthnasol sy'n diwygio yw O.S. 1988/526, 1991/1412, 2002/1479, 2008/1824.

(4)

O.S. 1962/2557; yr offerynnau perthnasol sy'n diwygio yw O.S. 1973/308, 1982/1627, 1983/6, 2002/1646.