Rheoliadau’r Fasnach mewn Anifeiliaid a Chynhyrchion Perthynol (Diwygio a Swyddogaethau Deddfwriaethol) ac Iechyd Anifeiliaid (Diwygiadau Amrywiol) (Cymru) (Ymadael â’r UE) 2022

Darpariaethau sy’n cynnwys swyddogaethau deddfwriaethol a swyddogaethau eraill

5.—( 1) Mae’r Atodlen yn cynnwys rhestr o ddarpariaethau Cyfarwyddebau’r UE sy’n rhoi swyddogaethau i’r awdurdod priodol, ynghyd ag unrhyw ddarpariaethau sydd i’w dargadw oherwydd eu bod naill ai i’w darllen gyda darpariaeth a restrir ac yn berthnasol i arfer y swyddogaeth honno, neu’n gysylltiedig â diben y swyddogaeth honno, at ddibenion paragraffau (2) a (3) o’r rheoliad hwn.

(2) Mae’r swyddogaethau a roddir gan y darpariaethau a restrir yn yr Atodlen, ynghyd ag unrhyw ddarpariaethau eraill a restrir yn yr Atodlen a allai fod yn berthnasol i arfer swyddogaeth a restrir, neu’n gysylltiedig â’i harfer, fel y’u haddesir gan Ran 5 o’r Rheoliadau hyn ac i’r graddau y maent yn ymwneud â llwythi y mae’r Rheoliadau hyn yn gymwys iddynt—

(a) yn arferadwy o ran Cymru gan Weinidogion Cymru i’r graddau y mae’r swyddogaethau o fewn cymhwysedd datganoledig;

(b) yn arferadwy fel pe bai’r darpariaethau hynny yn ffurfio rhan o gyfraith Cymru a Lloegr; ac

(c) i’w trin fel swyddogaeth a roddir gan y Rheoliadau hyn.

(3) Mae swyddogaeth o fewn cymhwysedd datganoledig at ddibenion paragraff (2)(a) pe bai o fewn cymhwysedd deddfwriaethol Senedd Cymru i roi swyddogaeth o’r fath mewn Deddf gan Senedd Cymru (a thybio, yn achos darpariaeth na ellid ond ei gwneud gyda chydsyniad un o Weinidogion y Goron o fewn yr ystyr a roddir i “Minister of the Crown” yn Neddf Gweinidogion y Goron 1975(1), y rhoddwyd y cydsyniad hwnnw).

(1)

1975 c. 26.