Rheoliadau Ychwanegion Bwyd Anifeiliaid (Awdurdodiadau) (Cymru) 2023

Enwi, rhychwant, cymhwyso a dod i rym

1.—( 1) Enw’r Rheoliadau hyn yw Rheoliadau Ychwanegion Bwyd Anifeiliaid (Awdurdodiadau) (Cymru) 2023.

(2) Mae’r Rheoliadau hyn—

(a) yn rhychwantu Cymru a Lloegr;

(b) yn gymwys o ran Cymru;

(c) yn dod i rym ar 22 Rhagfyr 2023.

Dehongli

2.—( 1) Mae i ymadroddion Cymraeg a ddefnyddir yn y Rheoliadau hyn sy’n cyfateb i ymadroddion Saesneg yn Rheoliad 1831/2003 neu Reoliad 767/2009 yr un ystyr ag yn Rheoliad 1831/2003 neu Reoliad 767/2009, yn y drefn honno.

(2) Yn Atodlenni 1 i 13—

(a) mae i ymadroddion Cymraeg a ddefnyddir i gyfeirio at rywogaethau neu gategorïau o anifeiliaid sy’n cyfateb i ymadroddion Saesneg a ddefnyddir yn Atodiad 4 (categorïau a diffiniadau o anifeiliaid targed etc.) i Reoliad 429/2008 yr un ystyr ag yn yr Atodiad hwnnw;

(b) mae unrhyw gyfeiriad at fân rywogaeth i’w ddarllen yn unol â’r diffiniad o “minor species” yn Erthygl 1 o Reoliad 429/2008.

(3) Yn y rheoliad hwn—

ystyr “Rheoliad 1831/2003” (“Regulation 1831/2003”) yw Rheoliad (EC) Rhif 1831/2003 Senedd Ewrop a’r Cyngor ar ychwanegion sydd i’w defnyddio mewn maeth anifeiliaid;

ystyr “Rheoliad 429/2008” (“Regulation 429/2008”) yw Rheoliad y Comisiwn (EC) Rhif 429/2008 ar reolau manwl ar gyfer gweithredu Rheoliad (EC) Rhif 1831/2003 Senedd Ewrop a’r Cyngor o ran llunio a chyflwyno ceisiadau ac asesu ac awdurdodi ychwanegion bwyd anifeiliaid(1);

ystyr “Rheoliad 767/2009” (“Regulation 767/2009”) yw Rheoliad (EC) Rhif 767/2009 Senedd Ewrop a’r Cyngor ar roi bwyd anifeiliaid ar y farchnad a’i ddefnyddio(2).

Awdurdodiadau

3.—( 1) Mae Atodlenni 1 i 13 yn cynnwys awdurdodiadau ychwanegion bwyd anifeiliaid.

(2) Yn ddarostyngedig i Erthygl 14(4) (adnewyddu awdurdodiad) o Reoliad 1831/2003, mae’r awdurdodiadau a nodir yn Atodlenni 1 i 13 yn peidio â chael effaith ar ddiwedd 21 Rhagfyr 2033.

Darpariaeth drosiannol: Endo-1,4-beta-sylanas (EC 3.2.1.8 ) (rhif adnabod 4a8i (4a8 yn flaenorol))

4.—( 1) Caniateir i’rychwanegyn bwyd anifeiliaid perthnasol a’r rhag-gymysgeddau sy’n ei gynnwys, a gynhyrchir ac a labelir cyn diwedd 21 Mehefin 2024 gan gydymffurfio ag amodau’r awdurdodiad ymlaen llaw a’r gofynion labelu sy’n gymwys cyn 22 Rhagfyr 2023, barhau i gael ei roi neu eu rhoi ar y farchnad a’i ddefnyddio neu eu defnyddio hyd nes y bydd stociau wedi eu dihysbyddu.

(2) Caniateir i fwyd anifeiliaid cyfansawdd a deunyddiau bwyd anifeiliaid sy’n cynnwys yr ychwanegyn bwyd anifeiliaid perthnasol ac a fwriedir ar gyfer anifeiliaid sy’n cynhyrchu bwyd, a gynhyrchir ac a labelir cyn diwedd 21 Rhagfyr 2024 gan gydymffurfio ag amodau’r awdurdodiad ymlaen llaw a’r gofynion labelu sy’n gymwys cyn 22 Rhagfyr 2023, barhau i gael ei roi neu eu rhoi ar y farchnad a’i ddefnyddio neu eu defnyddio hyd nes y bydd stociau wedi eu dihysbyddu.

(3) Yn y rheoliad hwn—

ystyr “awdurdodiad ymlaen llaw” (“prior authorisation”) yw’r awdurdodiad sydd wedi ei gynnwys yn Rheoliad y Comisiwn (EC) Rhif 902/2009 sy’n ymwneud ag awdurdodi paratoad ensym o endo-1,4-beta-sylanas a gynhyrchir gan Trichoderma reesei (CBS 114044) fel ychwanegyn bwyd anifeiliaid ar gyfer perchyll wedi eu diddyfnu, ieir i’w pesgi, ieir a fegir ar gyfer dodwy, tyrcwn i’w pesgi a thyrcwn a fegir ar gyfer bridio (deiliad awdurdodiad Roal Oy)(3);

ystyr “ychwanegyn bwyd anifeiliaid perthnasol” (“relevant feed additive”) yw’r ychwanegyn bwyd anifeiliaid endo-1,4-beta-sylanas (EC 3.2.1.8), sydd â’r rhif adnabod 4a8, a awdurdodwyd o dan yr awdurdodiad blaenorol(4).

Diwygio Rheoliad Gweithredu’r Comisiwn (EU) Rhif 601/2013

5.—( 1) Mae Rheoliad Gweithredu’r Comisiwn (EU) Rhif 601/2013 sy’n ymwneud ag awdurdodi cobalt(II) asetad tetrahydrad, cobalt(II) carbonad, cobalt(II) carbonad hydrocsid (2:3) monohydrad, cobalt(II) sylffad heptahydrad a chobalt(II) carbonad hydrocsid (2:3) monohydrad gronynnog araenedig fel ychwanegion bwyd anifeiliaid (5) wedi ei ddiwygio fel a ganlyn.

(2) Yn yr Atodiad, yn y tabl, hepgorer y cofnodion ar gyfer—

(a) cobalt(II) asetad tetrahydrad (rhif adnabod 3b301);

(b) cobalt(II) carbonad (rhif adnabod 3b302);

(c) cobalt(II) carbonad hydrocsid (2:3) monohydrad (rhif adnabod 3b303);

(d) cobalt(II) sylffad heptahydrad (rhif adnabod 3b305).

Diwygio Rheoliad Gweithredu’r Comisiwn (EU) 2019/221

6.—( 1) Mae Rheoliad Gweithredu’r Comisiwn (EU) 2019/221 sy’n diwygio Rheoliadau (EC) Rhif 785/2007, (EC) Rhif 379/2009, (EC) Rhif 1087/2009, (EU) Rhif 9/2010, (EU) Rhif 337/2011 a Rheoliadau Gweithredu (EU) Rhif 389/2011, (EU) Rhif 528/2011, (EU) Rhif 840/2012, (EU) Rhif 1021/2012, (EU) 2016/899, (EU) 2016/997, (EU) 2017/440 ac (EU) 2017/896 ynghylch enw deiliad yr awdurdodiad a chynrychiolydd deiliad yr awdurdodiad ar gyfer ychwanegion bwyd anifeiliaid penodol(6) wedi ei ddiwygio fel a ganlyn.

(2) Hepgorer Erthygl 4 (diwygio Rheoliad (EU) Rhif 9/2010).

(3) Hepgorer Erthygl 7 (diwygio Rheoliad Gweithredu (EU) Rhif 528/2011).

(4) Hepgorer Erthygl 9 (diwygio Rheoliad Gweithredu (EU) Rhif 1021/2012).

Dirymiadau

7.   Mae’r offerynnau a restrir yn Atodlen 14 wedi eu dirymu.

Lynne Neagle

Y Dirprwy Weinidog Iechyd Meddwl a Llesiant, o dan awdurdod y Gweinidog Iechyd a Gwasanaethau Cymdeithasol, un o Weinidogion Cymru

27 Tachwedd 2023