Rheoliadau Trwyddedu Morol (Apelau yn Erbyn Penderfyniadau Trwyddedu ) (Cymru) 2011

Darpariaethau ychwanegol ynghylch tystiolaeth a chostau

18.—( 1) Mae is-adrannau (2) i (5) o adran 250 o Ddeddf Llywodraeth Leol 1972(1) (ymchwiliadau lleol: tystiolaeth a chostau) yn gymwys, gyda'r addasiadau a ddisgrifir ym mharagraff (2), i unrhyw wrandawiad neu ymchwiliad o dan y Rheoliadau hyn, fel y maent yn gymwys i ymchwiliadau o dan yr adran honno.

(2) Yr addasiadau yw—

(a) rhaid darllen y cyfeiriad at “the person appointed to hold the inquiry” fel pe bai'n gyfeiriad at y person penodedig;

(b) rhaid darllen y cyfeiriad at “local authority” yn is-baragraff (b) ar is-adran (2) fel pe bai'n gyfeiriad at yr Awdurdod Trwyddedu;

(c) rhaid darllen y cyfeiriad at “such local authority” yn is-adran (4) fel pe bai'n gyfeiriad at yr Awdurdod Trwyddedu;

(ch) rhaid darllen y cyfeiriadau at “the Minister causing an inquiry to be held” fel pe baent yn gyfeiriadau at y person penodedig.

(3) Mae adran 322A o Ddeddf Cynllunio Gwlad a Thref 1990(2) (gorchmynion ynglŷn â chostau pan na chynhelir gwrandawiad nac ymchwiliad) yn gymwys mewn perthynas â gwrandawiad neu ymchwiliad o dan y Rheoliadau hyn fel y mae'n gymwys i wrandawiad neu ymchwiliad lleol y cyfeirir ato yn yr adran honno.

(4) Yn ddarostyngedig i baragraffau (1) a (3), rhaid i gostau gwrandawiad neu ymchwiliad a gynhelir o dan y Rheoliadau hyn gael eu talu gan Weinidogion Cymru.

(1)

1972 p.70. Diwygiwyd adan 250 gan Ddeddf Cyfiawnder Troseddol 1982 (p.48), adrannau 37, 38 a 46, gan Ddeddf Tai a Chynllunio 1986 (p.63), adran 49(2) ac Atodlen 12 a chan Ddeddf Cyfraith Statudau (Diddymiadau) 1989 (p.43).

(2)

1990 p.8. Mewnosodwyd adran 322A gan Ddeddf Cynllunio ac Iawndal 1991 (p.34), adran 30(1), a mewnosodwyd is-adran (1A) o'r adran honno gan Ddeddf Cynllunio 2008 (p.29), adran 196(4) ac Atodlen 10, paragraffau 1 ac 11.