Rheoliadau Gofynion Gwahanu Gwastraff (Cymru) 2023

Dehongli

2.   Yn y Rheoliadau hyn—

mae i “carafán” yr ystyr a roddir i “caravan” gan adran 75(5)(b) o Ddeddf 1990;

ystyr “cartonau a’u tebyg” (“cartons and similar”) yw pecynwaith cyfansawdd sy’n seiliedig ar ffibr, sef deunydd pecynwaith sydd wedi ei wneud o bapur-fwrdd neu ffibrau papur, wedi ei lamineiddio â phlastig polythen neu bolypropylen dwysedd isel, ac y gall fod iddo haenau o ddeunyddiau eraill, i ffurfio un uned na ellir ei gwahanu â llaw;

mae “cyflwyno gwastraff i’w gasglu” (“presenting waste for collection”) yn cynnwys meddiannydd mangre yn mynd â gwastraff a reolir i fan casglu canoledig;

ystyr “Deddf 1990” (“the 1990 Act”) yw Deddf Diogelu’r Amgylchedd 1990;

mae i “eiddo domestig” yr ystyr a roddir i “domestic property” gan adran 75(5)(a) o Ddeddf 1990;

ystyr “ffrydiau gwastraff ailgylchadwy” (“recyclable waste streams”) yw—

(a)

gwydr;

(b)

cartonau a’u tebyg, metel a phlastig;

(c)

papur a cherdyn;

(d)

gwastraff bwyd;

(e)

offer trydanol ac electronig gwastraff bach nas gwerthwyd;

(f)

tecstilau nas gwerthwyd,

y mae pob un ohonynt wedi ei ffurfio gan yr is-ffracsiynau gwastraff a restrir yn Atodlen 1, ac ystyr “ffrwd wastraff ailgylchadwy” yw pob ffrwd unigol a restrir ym mharagraffau (a) i (f);

mae i “gwastraff a reolir” yr ystyr a roddir i “controlled waste” gan adran 75(4) o Ddeddf 1990;

mae i “gwastraff bwyd” yr ystyr a roddir i “food waste” gan adran 34D(5) o Ddeddf 1990, ond nid yw’n cynnwys—

(a)

sgil-gynhyrchion anifeiliaid sy’n ffurfio deunydd Categori 1 fel y’i rhestrir yn Erthygl 8, neu ddeunydd Categori 2 fel y’i rhestrir yn Erthygl 9, o Reoliad (EC) Rhif 1069/2009 Senedd Ewrop a’r Cyngor sy’n gosod rheolau iechyd ynghylch sgil-gynhyrchion anifeiliaid a chynhyrchion sy’n deillio o anifeiliaid nas bwriedir i’w bwyta gan bobl(1),

(b)

gwastraff bwyd o fangre sy’n cynhyrchu llai na 5 cilogram o wastraff bwyd mewn saith niwrnod olynol, nac

(c)

unrhyw wastraff sydd wedi ei gategoreiddio’n wastraff peryglus o dan reoliad 6 o Reoliadau Gwastraff Peryglus (Cymru) 2005(2) neu sy’n cynnwys gweddillion gwastraff neu sylweddau sydd wedi eu categoreiddio’n wastraff neu sylweddau peryglus o dan reoliad 6 o’r Rheoliadau hynny, neu unrhyw wastraff sydd wedi ei halogi gan wastraff neu sylweddau o’r fath;

nid yw “mangre” (“premises”) yn cynnwys eiddo domestig na charafán;

ystyr “nas gwerthwyd” (“unsold”) yw cynnyrch treulwyr nas defnyddiwyd, mewn ffatri, mangre fanwerthu, cyfanwerthwr, warws neu fangre arall, nad yw wedi ei werthu i dreuliwr neu sydd wedi ei werthu i dreuliwr a’i ddychwelyd gan dreuliwr;

ystyr “offer trydanol ac electronig” (“electrical and electronic equipment”) yw offer sy’n ddibynnol ar geryntau trydan neu feysydd electromagnetig er mwyn gweithio’n gywir ac offer ar gyfer cynhyrchu, trosglwyddo a mesur ceryntau a meysydd o’r fath ac a ddyluniwyd i’w defnyddio â graddiad foltedd nad yw’n fwy na 1,000 o foltiau ar gyfer cerrynt eiledol a 1,500 o foltiau ar gyfer cerrynt union;

ystyr “offer trydanol ac electronig gwastraff bach” (“small waste electrical and electronic equipment”) yw offer trydanol ac electronig sy’n dod o fewn un o’r categorïau o offer trydanol ac electronig a restrir yn Atodlen 3 i Reoliadau Offer Trydanol ac Electronig Gwastraff 2013(3), ac eithrio eitemau sydd ag unrhyw ddimensiwn allanol sy’n fwy na 50 o gentimetrau;

ystyr “rheoleiddiwr” (“regulator”) yw Cyfoeth Naturiol Cymru.

(1)

EUR 2009/1069, a ddiwygiwyd gan O.S. 2020/1388, mae offerynnau diwygio eraill ond nid yw’r un ohonynt yn berthnasol.

(2)

O.S. 2005/1806 (Cy. 138), a ddiwygiwyd gan O.S. 2020/1339 (Cy. 296).

(3)

O.S. 2013/3113, a ddiwygiwyd gan O.S. 2018/1214.