Rheoliadau Gofynion Gwahanu Gwastraff (Cymru) 2023

Dyletswyddau mewn perthynas â chyflwyno gwastraff

3.—( 1) At ddibenion adran 45AA(4) o Ddeddf 1990, y gofynion gwahanu yw bod rhaid i bob ffrwd wastraff ailgylchadwy, fel gofyniad sylfaenol, gael ei chyflwyno i’w chasglu ar wahân i unrhyw ffrwd wastraff ailgylchadwy arall ac i fathau eraill o wastraff a reolir neu ddeunyddiau neu eitemau eraill.

(2) Er gwaethaf rheoliad 3(1), caniateir i wastraff bwyd o fewn ei becynwaith gwreiddiol gael ei gyflwyno i’w gasglu o fewn ffrwd wastraff ailgylchadwy gwastraff bwyd ar yr amod nad yw’n rhesymol ymarferol i’r meddiannydd wahanu’r gwastraff bwyd o’i becynwaith gwreiddiol ac y bydd y gwastraff yn cael ei gludo i gyfleuster, a’i brosesu mewn cyfleuster, ar gyfer—

(a) ei baratoi i’w ailddefnyddio, neu

(b) ei ailgylchu.

(3) Nid yw paragraff (1) yn gymwys i—

(a) meddiannydd ysbyty tan 6 Ebrill 2026;

(b) gwastraff a reolir a gesglir gan awdurdod lleol o ran unrhyw briffordd berthnasol y mae gan awdurdod lleol ddyletswydd mewn cysylltiad â hi o dan adran 89(1)(a) o Ddeddf 1990 i sicrhau bod y tir, cyhyd ag y bo’n ymarferol, yn cael ei gadw’n glir o sbwriel a sorod;

(c) gwastraff a reolir a gesglir gan brif awdurdod sbwriel o ran ei dir perthnasol y mae gan brif awdurdod sbwriel ddyletswydd mewn cysylltiad ag ef o dan adran 89(1)(c) o Ddeddf 1990 i sicrhau bod y tir, cyhyd ag y bo’n ymarferol, yn cael ei gadw’n glir o sbwriel a sorod.

(4) Yn y rheoliad hwn—

ystyr “ailgylchu” (“recycling”) yw unrhyw weithrediad adfer y mae deunyddiau gwastraff yn cael eu hailbrosesu drwyddo yn gynhyrchion, yn ddeunyddiau neu’n sylweddau pa un ai at y diben gwreiddiol neu at ddibenion eraill. Mae’n cynnwys ailbrosesu deunydd organig ond nid yw’n cynnwys adfer ynni ac ailbrosesu’n ddeunyddiau sydd i’w defnyddio fel tanwyddau neu ar gyfer gweithrediadau ôl-lenwi;

ystyr “paratoi i’w ailddefnyddio” (“preparation for re-use”) yw gweithrediadau adfer gwirio, glanhau neu atgyweirio, y mae cynhyrchion neu gydrannau cynhyrchion sydd wedi dod yn wastraff yn cael eu paratoi drwyddynt fel y gellir eu defnyddio drachefn at yr un diben y’u crëwyd ato heb unrhyw ragbrosesu;

mae i “prif awdurdod sbwriel”, “priffordd berthnasol” a “tir perthnasol” yr ystyron a roddir i “principal litter authority”, “relevant highway” a “relevant land”, yn y drefn honno, gan adran 86 o Ddeddf 1990;

mae i “ysbyty” yr ystyr a roddir i “hospital” gan adran 206(1) o Ddeddf y Gwasanaeth Iechyd Gwladol (Cymru) 2006(1).

(1)

2006 p. 42.